Кимсанов Улан Ашимович Кыргыз Республикасынын Министрлер Кабинетине караштуу Мамлекеттик бажы кызматынын төрагасы болуп дайындалды. Тиешелүү тескемеге Кыргыз Республикасынын Президенти Садыр Жапаров кол койду..

2026-жылдын 10-октябрында Адылбек Касымалиев Мамлекеттик бажы кызматынын жаңы жетекчисин мекеменин өздүк курамына тааныштырды. Иш-чаранын жүрүшүндө бажы кызматынын акыркы жылдардагы жетишкендиктери белгиленип, алдыга коюлган негизги милдеттерди мындан ары да натыйжалуу аткаруунун зарылдыгы баса белгиленди.

Өмүр баяны

Улан Ашимович Кимсанов 1971-жылдын 23-январында Фрунзе шаарында туулган. 1988-жылы Жалал-Абад облусунун Чаткал районундагы Терек-Сай айылындагы А. С. Макаренко атындагы орто мектепти аяктаган.1988–1991-жылдары Ташкент жогорку жалпы аскердик командалык окуу жайында билим алган.

 Жогорку билимдүү. 1995-жылы Кыргыз тоо-металлургия институтун, 2001-жылы Кыргыз мамлекеттик улуттук университетин «Юриспруденция» адистиги боюнча, 2011-жылы Кыргыз Республикасынын Президентине караштуу Башкаруу академиясын «Мамлекеттик башкаруу» адистиги боюнча аяктаган.

Бажы органдарындагы эмгек жолун 1997-жылы баштаган. Кызмат өтөгөн жылдары ар кандай кызматтарды, анын ичинде жетекчилик кызматтарды аркалап, «Манас», «Түштүк-Батыш» жана «Түндүк-Чыгыш» бажыларын жетектеген.

Мамлекеттик бажы кызматынын төрагасы болуп дайындалганга чейин, 2021-жылдан тартып МБКнын төрагасынын биринчи орун басары кызматын аркалап келген. Бажы кызматынын генерал-майору.