Кыргыз Республикасынын Министрлер Кабинетине караштуу Мамлекеттик бажы кызматынын кызматкерлери КР ИИМдин БМЖКККнын, ИИМдин жана Россия Федерациясынын Федералдык бажы кызматынын кызматкерлери менен биргеликте Россиядан Кыргызстанга «Альфа-PVP» психотроптук затын мыйзамсыз ташып кирүү жана сатуу боюнча эл аралык каналдын ишмердигин токтотууга багытталган атайын операция өткөрүштү.
Бишкек шаарында жүргүзүлгөн ыкчам-тергөө иш-чараларынын натыйжасында 1995-жылы туулган М.Р.А. аттуу жаран жана анын жубайы М.Е.А. кармалды.
М.Р.А. почта аркылуу алган аба муздаткычты текшерүү учурунда анын конструкциялык көңдөйлөрүнүн ичинен жалпы салмагы 1 кг 126 граммды түзгөн «Альфа-PVP» заты салынган брикет табылган. Жашаган жеринде жүргүзүлгөн тинтүү учурунда психотроптук заттарды таңгактоого жана таратууга арналган электрондук таразалар, ZIP-баштыкчалар жана башка буюмдар алынган.
Алдын ала маалыматтар боюнча, аталган партияны мыйзамсыз сатууда анын наркы 4,9 млн сомдон ашышы мүмкүн. Психотроптук заттын 6 800дөн ашык бир жолку дозасынын мыйзамсыз жүгүртүүгө түшүшүнө бөгөт коюлду.
Учурда эл аралык каналдын бардык катышуучуларын жана психотроптук заттарды мыйзамсыз жүгүртүүгө байланыштуу башка фактыларды аныктоо боюнча иш-чаралар улантылууда.